Wednesday, July 26, 2017

නව ජාතික දුම්රිය කෞතුකාගාරක් අවශ්‍ය ඇයි | Rivira NewsPaper

ශ්‍රී ලංකාවේ දුම්රිය සහ දුම්රිය සේවය පරම්පරා ගණනාවක් පසුකර තිබේ. ප්‍රවාහන හා ගමනාගමන ක්ෂේත්‍රයේ කේන්ද්‍රීය හැරවුමක් සනිටුවන් කරමින් දහ නව වන සියවසේ දී එංගලන්තයෙන් ආරම්භ වූ දුම්රිය සේවාවේ අත්දැකීම් සහ ප්‍රතිලාභයන් ඉන් වසර කිහිපයක් ඇතුළතම ශ්‍රී ලාංකිකයින් වන අපට ද හිමි විය. ඉන් පසු අද දක්වා මෙරට දුම්රිය සේවාව ගමනාගමන මාධ්‍යයක් ලෙස මෙන්ම භාණ්ඩ ප්‍රවාහන මාධ්‍යයක් ලෙස ද ඉතාම ප්‍රචලිතව භාවිත කෙරේ.

පැය කිහිපයක් තුළ මුහුදුකරයේ සිට විවිධ අත්දැකීම විදිමින් සමාජ, සංස්කෘතික, පාරිසරික විචිත්‍රත්වය විදිමින් ගමන් කළ හැකි මාධ්‍යයක් වේ නම්, ඒ ශ්‍රී ලංකාවේ දුම්රිය සේවාවම පමණි. එය ලොව අන් කිසිදු රටක දී අත්විදිය නොහැකි විශේෂ තත්ත්වයකි. එලෙස, සංචාරක කර්මාන්තය වෙනුවෙන් සිදුකෙරෙන දායකත්වය මෙන්ම කාර්යාල සේවකයින්ගේ අති බහුතරයක් තම ගමනාගමන අවශ්‍යතා සපුරන්නේ දුම්රියෙනි. එදිනෙදා සිය ප්‍රවාහන පහසුකම් සපයා ගැනීම ස`දහා දුම්රිය භාවිත කරන පිරිසද විශාල ගණනකි. එකී දුම්රිය සේවාව තවදුරටත් සංවර්ධනය විය යුතු බවත් තව තවත් පහසුකම් වලින් අනූන සේවාවක් බවට පත් විය යුතු බවත් සියලු දෙනා පිළිගන්නා සත්‍යයකි. මේ කතා කරන්නට සූදානම් වන්නේ දුම්රිය සේවයේ එවැනි අඩුලුහු`ඩු පිළිබ`ද නම් නොවේ.

දුම්රිය පිළිබද කතා කිරීමේ දී "ජාතික දුම්රිය කෞතුකාගාර" ජනප්‍රිය මාතෘකාවක් බවට පත්ව ඇත. ඒ නව ජාතික දුම්රිය කෞතුකාගාරයක් ඇති කරන්නට යන බවත් ඊට ඇතැම් පිරිස් එරෙහි වන්නේ ය යන ප්‍රවෘත්තී සමගය. මේ නිසාම දුම්රියට ආදරය කරන සහ ඒ ගැන උන්නදුවක් දක්වන්නෙක් ලෙස මේ ගැන යමක් ලිවිය යුතු බව කල්පනා කළෙමි.

දුම්රිය සේවය තවත් ආයතන කිහිපයක් සමග එක්ව කොළඹ දී නව දුම්රිය කෞතුකාගාරයක් ආරම්භ කිරීමට සූදානම් වන බවට මීට මාස කිහිපයකට පෙර වාර්තා විය. මේ පිළිබ`ද පියවරක් ගත් බවක් දක්නට නොලැබුණේ ඇයිදැයි සොයා බැලූ කල්හි දැනගන්නට ලැබුණේ දුම්රිය වෘත්තීය සමිති නියෝජිතයින් කිහිප පිරිසක් විසින් දිගින් දිගටම අකුල් හෙලීම නිසා මෙම ව්‍යාපෘති ප්‍රමාද වී ඇති බවයි. වෘත්තීය සමිති හා අයිතිවාසිකම් ඉල්ලන පිරිස් සමග අපේ රටේ කිසිදු ක්ෂේත්‍රයකට එතරම් දිගු ගමනක් යා නොහැකි බව නිදහසින් පසු ගෙවුණු වසර හැත්තෑව පුරාම අප දැක ඇත්තෙමු. වෘත්තීය සමිති හෝ කම්කරු සංවිධාන වලට කන්දුන්නා නම් අද වනතුරු කොළඹ කොටුවේ සිට මරදානටවත් දුම්රිය පාර සාදා නිමකරගන්නට නොහැකිව ම සුද්දෝ රට දමා යනු ඇත. ඉන් කියන්නේ වෘත්තීය සමිති නොසලකා හරින්නයැයි කියා නොව. නමුත්, දුම්රිය හෝ කුමන හෝ වේවා වෘත්තීය සමිති මොකකට වුවත් ආණ්ඩු කිරීමට හෝ රාජ්‍ය පාලනයේ යශ්ඨිය අතට ගැනීමට ඉඩ නොදිය යුතු බවයි. වෘත්තීය සමිතියක කාර්යය විය යුත්තේ, දුවන අශ්වයකුට ජවය හා ශක්තිය දෙමින් උපරිම සාර්ථක ජයග්‍රහණයක් වෙනුවෙන් දැක්කීම මිස අශ්වයාගේ අ`ඩු කැඩීම නොව.

යෝජිත නව දුම්රිය ජාතික කෞතුකාගාරයක් ඉදිකිරීමට සූදානම් වන බවට ප්‍රකාශ වීමත් සමග යටකී පරිදි දුම්රිය වෘත්තීය සමිති කෑ මොර දෙන්නේ කුමන කරුණු මත පිහිටා ද මෙන්ම කුමන හේතුවක් නිසා දැයි විමසා බැලිය යුතුය.

මෙම වෘත්තීය සමිති චෝදනා කරන්නේ ජාතික දුම්රිය කෞතුකාගාර කිහිපයක් ඇති විට, තවත් ජාතික කෞතුකාගාරයක් අවශ්‍ය ඇයි යන්නයි. මේ ගැන කියන්නට ඇත්තේ මෙපමණකි. කඩුගන්නාවේ හා බණ්ඩාරවෙල ඉදිකර ඇති ඊනියා ජාතික කෞතුකාගාර පිළිබ`ද කතා කරන්නට දෙයක් ඇත්තේම නැති තරම්ය. එහි යන ඕනෑම කෙනෙකුට ප්‍රත්‍යක්ෂ වන කරුණ වන්නේ, ඒවා ක්‍රියාත්මක වන්නේ ඕනෑවට එපාවට බවයි.

නවීනතම පහසුකම් සහ අංගසම්පූර්ණ අංගෝපාංගයන්ගෙන් සුසැදි කෞතුකාගාරයක් බව පවසමින් මීට වසර කිහිපයකට පෙර උත්සවශ්‍රීයෙන් කොළඹ නුවර ප්‍රධාන මාර්ගයට යාබද කඩුගන්නාව දුම්රිය ස්ථානය ආශ්‍රිතය ජාතික දුම්රිය කෞතුකාගාරය නමින් ආයතනයක් විවෘත කරනු ලැබීය. ගොඩනැගිල්ලක් වෙන්කරවාගෙන ප්‍රවේශපත්‍රයක් අළෙවි කර අදාල ක්ෂේත්‍රයට සම්බන්ධ යම් යම් දේවල් ස්ථානගත කර ඇති තැනක් මහජනයාට ප්‍රදර්ශනය කළ පමණින් එය කෞතුකාගාරයක් වන්නේ නැත. ඒ අනුව, කඩුගන්නාවේ ඇති දුම්රිය කෞතුකාගාරය ප්‍රශ්නකාරී ආයතනයකි. දුම්රිය මැදිරි කිහිපයක් හා දුම්රිය එන්ජින් කිහිපයක් වැස්සට තෙමෙමින් අව්වේ වේලෙන සේ ගාල්කර ඇත. රාත්‍රියට පරෙයියන්ද දවාලට කපුටන්ද ලගින වහළක් ඇති නමුත් වැසි දාට අහසින් පොළවට වතුර වැටෙන වහළය පසුකර කෙළින්ම පැමිණ නවතින්නේ කෞතුකාගාර පොළොවේය. මේ කෞතුකාගාරයට ගොඩ වන කෙනෙකුට ටික වේලාවකින් දැනෙන්නේ පරණ සමූපාකාරයකට ගියා වැනි හැ`ගීමකි. සිත් සංසිදුවීමට අසමත් වටපිටාව සහ ලාච්චුවක ඇසිරූ බඩු භාණ්ඩ මෙන් අහුරා ඇති භාණ්ඩ තුළින් කෞතුකාගාරයකින් අපේක්ෂා කරන නිදහස් හා පර්යේෂණාත්මක සැරිසැරීමක් අහිමිය. ආගන්තුක සත්කාර ඉතා පහළ තැනක ඇති මෙහි, යමක් කමක් කියා දෙන්නට අයෙක් නැත. පැමිණෙන අය කෙරෙහි කිසි අවධානයක් නැත. තාක්ෂණික උපාංග පිළිබ`ද දැනුවත් කිරිමක් නැත. කාර්ය මණ්ඩලය උදාසීනය. ඇතුළත මෙන්ම පිටත තත්ත්වයද එසේය.

තවද, කඩුගන්නාව වැනි තැනක් මේ සදහා තෝරාගත්තේ ඇයි යන්න තවත් ප්‍රශ්නකාරී වන්නේ කොළඹ නුවර පාර කොළඹ පිරිස් නුවර යාමට හා නුවර පිරිස් කොළඹ යාමට භාවිත කළ ද එම ස්ථානය අද වන විට හො`ද කේන්ද්‍රස්ථානයක් නොවේ. පුත්තලම, කුරුණෑගල සිට පැමිණෙන පිරිස් මෙන්ම උතුරු, නැගෙනහිර, මාතලේ, නුවරඑළිය, ඌව සහ උතුරු මැද පළාත්වල පිරිස් නුවර එන්නේ කඩුගන්නාව හමු නොවන මාර්ග ඔස්සේය. නුවරට පැමිණෙන කෙනෙක් 'අමුතු ගමනකින්' කඩුගන්නාවට යා යුතුය. නමුත් එසේ නොයමට බලපාන ප්‍රධාන සාධකයක් ලෙස අධික රථවාහන තදබදය සැලකිය හැකිය. දුර අනුව සැතපුම් කිහිපයක් වුව ද කඩුගන්නාව ඇත්තේ මහනුවර සිට පැයකට වඩා දුරින් බව මෙම ස්ථානය තේරූ පුද්ගලයින් නොදන්නවා ඇත. සීමිත ඉඩක ජනාකීර්ණ වී ඇති කඩුගන්නාව නගරයේ ඇති අසහනකාරී පරිසරය මේ කෞතුකාගාරයට එක් කරන්නේ මෙම ස්ථානයේ මෙම ආයතනය පිහිටුවීමේ දී අපේක්ෂා කළ භූමි වාසිය නොවන බව ශක්‍යතා අධ්‍යනය කළෝ නොසලකා ඇත. මෙවැනි විවිධ ප්‍රායෝගික ගැටළු හේතුවෙන් කඩුගන්නාව කෞතුකාගාරය අපේක්ෂිත අරමුණු කරා ල`ගා වීමට සමත්ව නැත.

සෙසු කෞතුකාගාර පිළිබද කියන්නට ඇත්තේ ද මේ හා සමානම කතාවකි. දුම්රිය එංජිමක්, මැදිරියක් සහ සංඥා උපාංග කීපයක් අන් අයට පෙනෙන්නට සැලැස්වීම කෞතුගාකාරයක් නොවන බව, බණ්ඩාරවෙල ඇත්තේ දුම්රිය කෞතුකාගාරයක් යැයි විශ්වාස කරන සියලු දෙනාටම ගෞරවයෙන් සිහිපත් කර දිය යුතුය. දුම්රිය වෙනුවෙන් ජාත්‍යන්තර මට්ටමේ ජාතික කෞතුකාරයක් අවශ්‍ය බව කවුරුත් පිළිගන්නා දෙයකි. එනමුත්, සමහර දේ ඒ ඒ තැනම පල් වෙවී විස`දුම් සෙවිය නොහැක්කා කියන්නා වාගේ, මේ වන විට ස්ථාපිත කර ඇති එවන් කෞතුකාගාර ජාතික හෝ ජාත්‍යන්තර මට්ටමට සංවර්ධනය කළ නොහැකි බවද අප පිළිගත යුතුය. දුම්රිය කෞතුකාගාර අද පත්ව ඇත්තේ ප්‍රතිසංස්කරණයන් තුළින් ගොඩ ගත හැකි තැනක නොවේ. එහෙයින්, වෙනසක් අවශ්‍යය.

නාම පුවරුවකට පමණක් සීමා වූ ඊනියා ජාතික කෞතුගාරයට රැවටී, නව ජාතික දුම්රිය කෞතුකාගාරයකට එරෙහිව ක`දවුරු බ`දින මෙම ඊනියා දුම්රිය වෘත්තීය සමිති නගන තවත් චෝදනාවක් වන්නේ, රජයේ බැංකුවක් වන මහජන බැංකුව දුම්රිය කෞතුකාගාරයක් වෙනුවෙන් මුදල් යොදවන්නේ කුමන පදනමක පිහිටා ද යන්නයි.

දැනගන්නට ඇති පරිදි මෙම රාජ්‍ය බැංකුව යටකී නව දුම්රිය කෞතුකාගාර ව්‍යාපෘතිය සදහා මුදල් යොදවන්නේ දෙපාර්ශවයටම වාසිදායක පදනමක පිහිටාය. එක් පැත්තකින් ජාතික අවශ්‍යතාවක් වන ජාතික දුම්රිය කෞතුකාගාරයක් නිර්මාණය කිරීම සදහා එම බැංකුව මගින් මුදල් ආයෝජනය කෙරෙන අතර, එයට ප්‍රතිලාභ ලෙස (හිලව්වට) දිවයින පුරා දුම්රිය මාර්ග පද්ධතිය ආවරණය වන පරිදි නවීන පහසුකම් සහිත ස්වයං බැංකුකරණ පද්ධති ස්ථාපිත කිරීමට කටයුතු කෙරෙන බව එම තොරතුරු වල ස`දහන්ය. සාමාන්‍යයෙන් බැංකුවක් වැනි මුල්‍ය ආයතනයක් මෙවැනි ප්‍රවර්ධන සහ සේවා සැපයීමේ අවකාශයන් ලෙස දුම්රිය සේවය සතු දේපල භාවිත කිරීමේ දී ගෙවීමක් කළ යුතුය. එලෙස කරනු ලබන ගෙවීම් විවිධ සිල්ලර වැඩ ස`දහා යොදාගෙන එකවර ලැඛෙන ලොකු මුදල් කුට්ටිවලින් නිසි ප්‍රයෝජනයක් නොගත් අවස්ථාවන් දුම්රිය සේවයේ පමණක් නොව සෙසු සෑම ආයතනයකම පාහේ අප දැක ඇත. මෙහිදී මහජන බැංකුව එවැනි ගෙවීමක් නොකළ ද දුම්රිය සතු ඉඩ තමන්ට ලබා දීම වෙනුවෙන් සහ ජාතික අවශ්‍යතාවක් වෙනුවෙන් මහජන බැංකුව යොදවන මෙම මුදල් දිගුකල් පවත්නා මෙවැනි ව්‍යාපෘතියකට යොමු කිරිම පිළිබ`ද අප කළ යුතු වන්නේ දුම්රිය සේවයට ප්‍රශංසා කිරීමයි. එසේම, තමන් යොදවන මුදල් නාම පුවරු සවි කිරිම, බිත්ති පින්තාරු කිරිම වැනි සිල්ලර වැඩ ස`දහා නොයොදවා ජාතික කටයුත්තක් වෙනුවෙන් මුදල් යෙදවිය යුතු බවට වන කොන්දේසියක් මත පිහිටා ආයෝජනය කිරීම පිළිබ`ද මහජන බැංකුවට ද ජාතියේ ගෞරවය හිමි විය යුතුය.

වෘත්තීය සමිති විසින් නිකුත් කර තිබූ නිවේදනයකට අනුව, දුම්රිය සේවය යටතේ ජාතික දුම්රිය කෞතුකාගාර ව්‍යාපෘතිය වෙනුවෙන්ම නව සමාගමක් ලියාපදිංචි කිරීම නීතිවිරෝධී බව කියැවේ. නීතිය දන්නා අය දන්නා කරුණ නම්, විශේෂිත වූ ව්‍යාපෘති වෙනුවෙන් රාජ්‍ය ආයතනයන් යටතේ උප ආයතන ඇති කිරීමේ ඕනෑ තරම් හැකියාවක් ඇත. එසේම, ඒ වෙනුවෙන් නීතීයේ ප්‍රතිපාදනද සලසා ඇත. රේල්වේ මියුසියම් ගැරන්ටී ලිමිටඩ් නම් සමාගම දුම්රිය දෙපාර්තමේන්තුව යටතේ ස්ථාපිත කර ඇත්තේ ගැරන්ටීඩ් ලිමිටඩ් එකක් ලෙසය. මෙලෙස ගැරන්ටී ලිමිටඩ්, නැතිනම් ඇපයෙන් සීමිත සමාගම් ස්ථාපිත කරන්නේ ලාභ නොලබන සමාගම් ලෙසය. නිශ්චිත අරමුණක් වෙනුවෙන් ස්ථාපිත කරන මෙවැනි සමාගම් නියමිත මව් ආයතනයේ අධීක්ෂණය හා නියාමනය යටතේ පවත්වාගෙන යයි. එවැනි සමාගම් කිසිවෙක කවුරුන් සාමාජිකත්වය ලැබූව ද ඒවා ඒ ඒ පුද්ගලයින්ගේ අභිමතය පරිදි මෙහෙයවිය නොහැකිය. පැහැදිළිව දක්නට ඇති කරුණ නම්, මෙලෙස සමාගමක් ස්ථාපිත කර ඇත්තේ රාජ්‍ය සේවයේ දක්නට ඇති සාම්ප්‍රදායික අලස බව හා ප්‍රමාදය වලක්වාලමින් අවශ්‍ය අවස්ථාවන් වල දී අවශ්‍ය තීන්දු තීරණ ගෙන මෙම ව්‍යාපෘතිය කාර්යක්ෂමව අවසන් කිරීමේ අරමුණින් විය යුතුය.

තවදුරටත් කරුණු දක්වන මෙම වෘත්තීය සමිති පවසන්නේ දුම්රියේ දහසකුත් එකක් අඩුපාඩු හා අවශ්‍යතා ඇති හෙයින් දුම්රිය කෞතුගාකාරයක් වෙනුවෙන් නොව මහජන බැංකුවේ මෙම ප්‍රදානය ඒ නොයොදා එවැනි අවශ්‍යතා ඉටු කර ගැනීම වෙනුවෙන් යොදවන ලෙසයි. අප ඔවුන්ගේ ඉල්ලීම එලෙස සිදුවූයේ යැයි මොහොතකට කල්පනා කළහොත්, කියන්නට ඇත්තේ එක දෙයකි. එසේ නම් මෙම කෝටි ගණනක මුදල්ද පෙර අප දන්නා පරිදිම යොමු වන්නේ උදාසීන හා අකාර්යක්ෂම නිළධාරීන් අතරටමය. තේරෙන භාෂාවෙන් කියන්නේ නම්, මේ වෘත්තීය සමිති අර අදින්නේ, දහදුක් විද උපයා ගත් වැටුපෙන් සීනි බෝල කා අවසන් කිරීමකටය. එය හාස්‍යයෙන් බැහැර කළ යුතුයැයි ලියුම්කරුවා විශ්වාස කරයි.

ලංකාවට ජාතික දුම්රිය කෞතුකාගාරයක් අවශ්‍ය වන්නේ ඇයි?

දුම්රිය පිළිබ`ද ඇත්තේ ඉහළ රසිකත්වයකි. දුම්රිය ප්‍රේමීන් හා දුම්රියට ආදරය කරන බොහෝ දෙනෙක් පිළිබද තොරතුරු සමාජ ජාලා හා මාධ්‍ය භාවිතයේ දී දක්නට ලැබේ. ඔවුහු තම රසිකත්වය හා විනෝදාංශ වෙනුවෙන් සාධාරණ මිලක් පවා ගෙවීමට සූදානම් වන පසුබිමක එය තවත් පසෙකින් දුම්රිය සේවයට හා රජයට ආදායම් මාර්ගයක් කර ගත හැක. එපමණක් නොව, සංරක්ෂණය, ප්‍රදර්ශනය හා අධ්‍යාපනය යන අංශයන්ගෙන් ද මෙරටට මෙවැනි ජාතික කෞතුකාගාරයක අවශ්‍යතාව දැඩිව දැනේ.

ජාත්‍යන්තර මට්ටමේ කෞතුකාගාරයකින් බලාපොරොත්තු වන අභ්‍යන්තර හා බාහිර අපේක්ෂාවන් වේ. ඉන් ප්‍රධාන වන්නේ සංරක්ෂණය හා ප්‍රදර්ශනයයි. සංරක්ෂණය පැත්තෙන් සැලකූ විට පැරණි වන හා නවීන ආදේශකයන් හේතුවෙන් භාවිතයෙන් ඉවත් කරන හෝ අතීතයට එක් කරන වැදගත් සිහිවටනයන් මතු පරපුරේ පරිහරණය වෙනුවෙන් සංරක්ෂණය කළ යුතුය. එසේම, ඒවා සෙසු අයට දැක බලා ගැනීමට සැලැස්වීමෙන් අපේක්ෂා කරන්නේ ජාතියක් පිළිබ`ද අභිමානයක්, ඉතිහාසය පිළිබද දැනුමක් මෙන්ම තොරතුරු ලබා දීමය. ජාතික දුම්රිය කෞතුකාගාරය ද ජාතික කෞතුකාගාරය හෝ ජාතික මාර්ග කෞතුකාගාරය තරම්ම වැදගත්ය.
එසේම, කොළඹ දී ඉදිකිරීමට යෝජිත අභිනව කෞතුකාගාරය මෙරට සංචාරක කර්මාන්තයයේ ඉදිරි ගමන වෙනුවෙන් ද තීරණාත්මක වනු ඇත. එම කෞතුකාගාරය ඉදිකරන්නට අපේක්ෂා කරන්නේ කොළඹ වීම වැදගත් ලක්ෂණයකි. රටක අගනුවර යනු සෑම අංශයකින්ම වැදගත්ම සංධිස්ථානයයි. ලොව සෙසු බොහෝ රටවල ද මෙවැනි තැන් නිර්මාණය කර ඇත්තේ වෙළ`ද අගනුවර, වෙළ`ද හෝ සංචාරක මර්මස්ථාන මූලික කරගෙන ය. කොළඹට පැමිණෙන සංචාරකයින්ට මෙන්ම විශේෂයෙන්ම කෙටි කාලයක් සදහා කොළඹට පමණක් පැමිණෙන සංචාරකයින්ට කොළඹ දී නැරඹීමට අවස්ථාව උදාවන ස්ථානයන් අතර මෙම කෞතුකාගාරය ප්‍රමුඛස්ථානයක් වනු ඇත. එසේම, මුළු රට පුරා සිට කොළඹට පැමිණෙන දේශීය සංචාරකයින්ටද මෙම කෞතුකාගාරය නැරඹීමට අවස්ථාව උදාවනු ඇත.

ලෝක මට්ටමින් පිළිගත් ජාත්‍යන්තර ප්‍රමිතියෙන් යුතු ජාතික දුම්රිය කෞතුකාගාර යනු කවරක්දැයි ඉදිරි ලිපියකින් ලියා සිටීමට අදහස් කරමි.

- මාලින්ද ජයතිලක

No comments: