Wednesday, October 31, 2012

“කර්ම“ - කොන්ඩම් යූස් කරන්න එපා


මොර සූරන වැහි ඇද වැටෙමින් තිබෙන මද්දහනේ ලේක්හවුස් හන්දියෙන් බැස තෙත බරිතවම රීගල් සිනමා ශාලාව තුළට රිංගා ගතිමි. ඒ ‘කර්ම‘ චිත්‍රපටයයි. ‘මගහැර යා නොහැකි ගැහැණියකගේ කතාව‘යැයි සදහන්ව තිබිණි. මින් පෙර මෙම චිත්‍රපටය බැලූ කිහිප දෙනෙකු මේ සම්බන්ධයෙන් විවිධ දේ කියා ඇත. එහෙයින්, මින් පෙර නොබැලූ චිත්‍රපටයක් සම්බන්ධයෙන් පූර්ව විනිශ්චයක් හෝ පූර්ව විචාරයකින් පසු ඒ සියල්ල අමතක කරමින් ස්වයං විචාරයීය මනසකින් යුක්තව මෙම සිනමාව කියවා ගැනීම නැමැති ඛේදවාචකයට මුහුණ දෙමින් ජාතික ගීයට නැගී සිටියෙමි. 

නදීක යනු ස්ත්‍රියක විසින් සීමා රහිතව තවත් පිරිමියෙකු වෙනුවෙන් දෙනු ලබන පිදීම් වල ඵල නෙළමින් සිටින්නෙකි. ගණිකාවක් ඇසුරට ගිය එකෙකු සේ, මුළු ආඛ්‍යානය පුරාම ලිංගික සහවාසය හේවත් රමණයෙන් පසු, එතෙක් පවත්නා ප්‍රේමණීය හා හෘද්‍යාංගම තත්ත්වයෙන් ක්ෂණිකවම මිදී සිය වොග්ස්වගන් බීට්ල් රථයේ නැගී නික්ම යයි. එසේම, සමස්ථ ලිංගික සහවාසය පුරාම ඔහු විසින් ආවේශ වූ සල්ලාලයකු සේ ඇයගේ රසෝඝය භුක්ති විදිමින් සිටියි. එහි තැනෙක අමා මෙසේ කියා සිටියි. ‘අනේ නදී, මම කොන්ඩම් යූස් කරනවට කැමති නෑ‘. අමා යනු නදීක කෙරෙහි දැඩි විශ්වාසය තැබීම හේතුවෙන් එසේ කියනවා විය හැකිය. එසේ නොවන්නේ නම්, ගැබ් ගැනීම හෝ බඩ වීම යනු තමාගේ ක්‍රමයට අනුව ‘එච්චර දෙයක් නෙවෙයි‘යැයි ඇයට හැගෙනවා විය හැකිය. එසේ ද නොවන්නේ නම්, ලිංගික ආශ්වාදයේ උපරිමය භුක්ති විදීම කෙරෙහි කොන්ඩමය බාධාවක් යැයි තීරණය කරන ඈ, ඉනික්බිති සිදු වන්නේ කුමක් ද යන්න පිළිබද නොතකා හෝ නොසිතා, අවස්ථානුකූල උපරිම වින්දනය අපේක්ෂා කරනවා විය හැකිය. පුරුෂ ලිංගය හා ස්ත්‍රී ලිංගය එකිනෙක ස්පර්ශයේදී දැනෙන උණුසුම, හට ගන්නා තාවකාලික හෝ ආදරණීය හැගීම, ආශ්වාදය හෝ වෙනයම් හැකීමක් කෙරෙහි රබර් කොන්ඩමය බාධා කරනවාට ඇය සිය නොකමැත්ත දක්වනවා ද විය හැකිය.

පියල් විසින් නියෝජනය කරමින් සිටින්නේ, අනුන්ගේ ප්‍රේම කරුමයන් තමන්ගේ කර ගනිමින් කර ගන්නා අති බහුතර ‘අවංක‘ ප්‍රේමවන්තයින්ගේ සංඛේතයකි. පියල් විසින් අමා කර ගසනු ලබන්නේ ඇයි. නදීක ශාරීරික වශයෙන් ලබා ගන්නා ලිංගික ආශ්වාදය හෝ කායික පහස ඇසින් හා කණින් පමණක් ලබා ගත් නිසා ද. එසේ නොවන්නේ නම්, නදීක සමග උද්‍යෝගයෙන් හා රාගික බවේ උපරිමයෙන් රමණය කරමින් සිටින අමා සමග එවැනිම ලිංගික අත්දැකීමක් තමා ද සන්තක කර ගැනීමේ අරමුණින් ද. මුල් කාලීනව ඔහු විසින් ඇත්ත වශයෙන්ම කරමින් සිටින්නේ, අටේ හෝ හතේ පංතියේදී පත්තර තට්ටුව යට ඇති ‘වැල‘ පත්තර පාසලට ගෙනැවිත් හොර රහසේ බලමින් ගන්නා ආතල් එක ගැනීමටයි.

පියල්ට නදී දර්ශනය වන්නේ, සිය මවගේ වියෝවත් සමග මානසික වශයෙන් දැඩි බිද වැටීමකට ලක්ව ඇති අවස්තාවකය. ඔහුට දාරක ස්නේහය අහිමි වී තිබේ. ‘නෑ, තාත්ත කොච්චර කීවත්, මම ගෙදර එන්නෙ නෑ. නෑ, නෑමයි‘ කියමින් ගාලු කොටුව දිගේ ඇවිද යයි. එසේ කිරීමට ඔහුට සිදු වන්නේ, ඔහුගේ එකම මානසික සහන සපයන්නා වූ සුරතල් පූසාගේ ජීවන රටාව සම්බන්ධයෙන් පවා සමාජයීය ප්‍රතිවිරෝධය එල්ල වෙමින් තිබෙනා විටය. ‘මල්ලි, උඹ නාට්‍ය කරන්න යනකොට ඔය පූසාවත් අරගෙන පලයංකො. දවල්ට පුදුම වදයක් දෙන්නෙ‘ යැයි ඔහුගේ වීදි සගයෙකු ඔහුට කියා සිටියි. අවුරුදු තිහකට කිට්ටුව ජීවත් වන්නෙකුට, දාරක ස්නේහය අහමි වීම, ගෙදර අපායක් වීම හා සමාජය එරෙහි වීම යන කරුණු මගින්, ඔහු අනාථයකු බවට පත්ව සිටියි. එහෙයින්, ගිලෙමින් තිබෙන ආත්මයට හුස්මක් අවශ්‍යව තිබේ. අමාත ඔහුට හමු වන්නේ එවිටයි. එසේම, සෙසු ගමන් සගයින් සියලු දෙනා විවාහ වී හෝ ආදරවන්තයින් වී සිටින අවස්තාවක තනිකඩයකු වී සිටීමට සිදු වීම නම් වූ ඛේදනීය ඉරණම ද ඔහුට හිමිව තිබේ.

මිෂෙල් යනු කලකින් යළි සිය රටට පැමිණි නමුත්, සමාජයීය වහයෙන් පෙර පැවති කිසිදු සබදතාවයක් ඉන් පසු යාවත්කාලීන නොවූ ස්වකීය ආත්මයට සාපේක්ෂව පොදු සමාජය තුළ හුදෙකළා වූ ගැහැණියකි. එසේම, ඈ යළි සිය රට පැමිණෙන්නේ, ඇත්ත වසන් කිරීමකින් හෝ ඉතාම කෙටි කාලයකින් අසු විය හැකි පරිදි බොරුවක් ලෙස වසන් කර ගත යුතුව ඇති කර්ම විපාකයක් ද සමගිනි. ඇය පියවුරු පිළිකා රෝගිනියකි. ඇතැම් විට, ‘කොන්ඩම් යූස් කරන්න එපා‘ යනුවෙන් ඇය කියා සිටින්නේ, සියල්ල අහිමි වීමට මොහොතක් ඇති විට අහිමි වෙතැයි යන ආශ්වාදය හෝ රැක ගැනීමේ අදිටනින් විය හැකිය.

නදීක ජීවත් වෙන්නෙ නදීකගෙ ආත්මය තුළ පමණයි. අමා ගැබ් ගන්නවාට නදීක බයයි. ඔහුගේ ශුක්‍ර ධාතුවෙන් ගැබ් ගන්නා අමාට, දරුවා හදා සිටීමෙන් වලකින්න යැයි ඔහු බල කර සිටියි. එසේම, අමා පියවුරු පිළිකාවකින් පෙළෙන බවට ඔහුට සදහන් නොකිරීම සම්බන්ධයෙන් සහවාසය අතරතුර දී පවා ඔහු දැඩිව ප්‍රශ්න කරයි. ආදරය කළ යුත්තේ පරිපූර්ණ හෝ සම්පූර්ණ හෝ ගැහැණියකට පමණක්ය යන ආත්මාර්ථකාමී හැගීම නදීක තුළ හොල්මන් කරනව. එහෙම නෙවෙයිනම්, ‘ඒකිට මොනව වුණත්, මම ඒකිත් එක්ක ජීවත් වෙනව‘ කියන පියල්ගේ තත්ත්වයට ඔහු පත් විය යුතුය.

අවසානයෙදි, රට යන්න පැය කිහිපයක් පමණක් තිබියදිත්, අමා නදීක වෙනුවෙන් නිර්වස්ත්‍ර වෙනව. එය ද අවසන් වන්නේ, ශුක්‍රාණු පිටවීමෙන් පසු, අදාල ගණුදෙණුව අවසන් වීමෙන් පමණක්ව. ඇය වෙනුවෙන් ජීවිතයක් ලබා දීම කෙරෙහි නදීක උත්සුක නොවන්නේය. නදීක යනු අත්ලේ රේඛා මගින්, ‘යන්තරයක් වගේ මිනිහෙක්‘ව සටහන්ව තිබෙන්නෙක් වැනිය. ඔහු, අමා වෙනුවෙන් ගබ්සාකිරීමට හෝ පියවුරු පිළිකාවට අදාල බෙහෙත් වේල පවා ලබා දෙන්නේ, ‘බල්ලන්ට ලෙළි පොල් දාන්නාක්‘ සේය. අමා නදීක අත්හැර පියල්ව තෝර ගන්නව. අමා පියල් සමග නික්ම ගිය ද නදීක ඇය හඹා යාම නවත්වන්නේ නැති අතර හඹා යන්නේ ද නැත. අමා ඇදිවතේ මුත්‍රා ගියාම අතින් අල්ලල හෝදන්නෙ පියල්, අමාගෙ යට ඇදුම් ද ඇතුළු ඇද අවසන් වූ රෙදි හෝදන්නෙ පියල්. අමාගෙ ලේ වමනය වෙනුවෙන් දෑත දිගු කරන්නෙ පියල්.

‘උඹ මැරෙන එකේ තේරුමක් තියනව ද‘ ප්‍රසන්න ජයකොඩි ජීවත් වීම යනු විදවීම හෝ අපේක්ෂා රහිතව කාලය ගත කිරීම බවට පත් කර ගත්තවුන්ගෙන් ප්‍රශ්න කරනව. ඔහු කියන්නේ, ‘ජීවත් වෙලා තේරුමක් නෑ‘ කියන එකම වෙන්න පුළුවන්. මේ ප්‍රශ්නෙ අහනවත් එක්කම එවැනි තත්ත්වයකට පත් වුණ කෙනෙකුගෙන් තමන්ගෙ හෘදය සාක්ෂිය අහන ප්‍රශ්නෙ, ප්‍රසන්න අමුවෙන් අහනව. ‘උඹ ජීවත්වෙන ඒකෙ තේරුමක් තියනව ද‘. මානව ලක්ෂණයන්ට අනුව, මැරෙන්න ඔන්න මෙන්න ඉන්න මිනිහෙකුට ‘මැරියං‘ කියල කීවම ජීවත් වෙන්න ඕනෙ කියල හිතෙනව. උඹ මැරෙන එකේ තේරුම මොකද්ද කියල ඇහුවම, මැරෙන්නවත් සුදුසු තත්ත්වයක නොසිටිනා බව සන් කරනව. එසේම, ජීවත් වෙන එකේ තේරුමක් තියනව ද කියල අහනකොටම, තේරුමක් ඇතිව ජීවත් වීමේ අවශ්‍යතාවය දැනෙන්න පටන් ගන්නව. පියල් වෙනුවෙන් ජීවත් වීමේ අපේක්ෂාව ලබා දෙන්නෙ, ඔහුව මැදිකරගත්ත මේ ප්‍රශ්නෙ වෙන්න පුළුවන්. 

යටකී වේදිකා නාට්‍ය තුළ, තවත් දෙබසක් තුළින් භාහිරට නොපෙන්වන නමුත්, අභ්‍යන්තරය තුළ කැකෑරෙමින් තියන පියල්ගේ හා නදීකගෙ අභ්‍යන්තර ආඛ්‍යානය කියවනව. අමා යනු නදීක වෙනුවෙන් සියල්ල ලබා දුන් අයෙක්. නමුත්, දැන් වන විට අමා පියල්ගේ දේපලක්. ස්වභාවික ස්ත්‍රී ලක්ෂණයන් අනුවම, ගෑණු වෙනස් වෙන්න පුළුවන්. ඒ කියන්නේ, නදීකව අත්හැරපු අමා, යළිත් අවස්තාවක පියල් අත්හැර නදීක වෙත යෑමේ අවධානමක් තියනව. ‘උඹ ජීවත්වෙනවට මම බයයි‘, මේ පියල් විසින් නදීකට කියා සිටින දේ. එතකෝට, නදීක ‘මම මැරෙන්න බයයි‘ කියන්නෙ ඇයි. තවමත්, නදීක තුළ අමා යළි පැමිණෙතැයි අපේක්ෂාවක් තියනව. එතකොට, අමාගෙ ජිවිතයෙන් නදීක මිය යාම එවැනි දෙයක් සිදු නොවීමට නියත හේතුවක්.

අවසානයේදී, ප්‍රසන්න ‘කර්ම‘ අවසන් කරන්නෙ සාම්ප්‍රදායික තැනකින්. ‘ඒකි බඩ වෙලා ආවත් මම ඒකිට ආදරෙයි‘ කියන ටිපිකල් නැත්තම් පොදු සමාජ වාග් භාවිතය සිනමාවක ලියන්න ප්‍රසන්න උත්සාහ කරල. කර්ම කියවගෙන යනකොට, තවමත් නොතේරෙන දේවල් කිහිපයක් තියනව. නාට්‍ය පුහුණුවීම් අවසන් වෙලා යළි පැමිණෙමින් එන විට, කෝච්චියක් පැමිණීම හා ඉනික්බිති සිදුවන දේවල් සමූහය ගොන් පාර්ට් එකක් සේ හැගේ.

ඒ වගේම, ශුක්‍රාණු ස්ත්‍රී ලිංගය තුළට ඇතුළු වන බව දැන දැනත් සංසර්ගයේ යෙදෙනෙ විධික්‍රමයක් හා එවැන්නක් සිදු වූ බව දැන ගත් වහාම, සිදු කිරීමට විවිධ විසදුම් ඇති බව හොදින්ම දන්නා සමාජයක් තුළ කොන්ඩමයක් නැතිව රමණය කිරීමෙන් පසු, ගැබ් ගැනීමක් දක්වා නාගරික තරුණියක රුගෙන යාමේ අභිප්‍රාය කුමක් ද? එක්කෝ, නාගරික තරුණියන් කොටට ඇන්දාට, නිදහසේ රමණය කළාට, ඉංග්‍රීසි සිංදු ඇහුවට, ඉංග්‍රීසියෙන් කතා කළාට, පුද්ගලික රෝහල් වල ප්‍රතිකාර ලැබුවට - අනවශ්‍ය ගැබ් ගැනීමකින්වත් වැලකී සිටීමට නොදන්නේ යැයි ඒත්තු ගැන්වීමට විය හැකිය. ඒක වෙන්න තිබුණේ, කොන්ඩම් එකක් දාල රමණය කළාට පස්සේ, කොන්ඩම් එක පුපුරළා ශුක්‍රාණු පිටවීමක් වගේ දෙයක්. එක්කෝ, භාහිරින් කරපු දේකින් නොසැලකිල්ලෙන් සිදු වන ගැබ් ගැනීමක්. ඔහු එක තැනකදි ඒක හොදින් නිරූපණය කරල, ගැබ් ගැනීම කියන තැනදි අසමත් වෙනව.

පියල් මී පාසනම් තියන්නේ පූසාව එළියට දාල දොර වහල. පූසා මී පාසනම් කන්නෙ පියල් නොදැනුවත්ව දොරෙන් රිංගලා ඇවිත් මීයන් අල්ලන්න ගිහිං. අමාව ගැබ් ගන්න තිබුණෙත් එහෙම. නදීක කොන්ඩමයක් දාල අමා සමග රමණය කරනව. වැරදීමකින් යටකී පරිදි ශුක්‍රාණු පිටවෙලා අමා ගැබ් ගන්නව. පූසාට වෙච්ච දේ අමාට වෙනව. ප්‍රසන්න සංඛේතය හරිහැටි භාවිත කළ ද මෙතැනිදි අසමත්. 

Tuesday, October 30, 2012

පාන් රාත්තල 62 යි. දැන්වත් සනීප ද

මින් සති කිහිපයකට පෙර අරක්කු, බියර් හා සිගරට් වල මිළ ඉහළ දැමීමට රෙජීමය කටයුතු කළේය. මෙම තීරණය මාධ්‍ය ඔස්සේ දැනුම් දීමත් සමග පන්සල් වල හාමුදුරුවරුන් ද, නිවෙස්වල භාර්යාවන් ද සමාජයේ අමද්‍යප පිරිමින් ද වශයෙන් දහස් ගණනක් දෙනා ‘හොද වැඩේ‘ කියමින් හුරේ දමන්නට විය. ඔහුන් විසින් එසේ කර සිටීමට බලපෑ හේතූන් වූයේ, තමන් අරක්කු හා සිගරට් සම්බන්ධයෙන් දැඩි විරෝධයක් දක්වමින් සිටින බවට සමාජයට සැල කිරීමට හෝ ඇත්ත වශයෙන්ම කිසිදු වෙනත් අදහසක් නොමැතිව අරක්කු හා සිගරට් මිල ඉහළ දැමීම සම්බන්ධයෙන් සිය පක්ෂපාතාතීත්වය පෙන්වීමටය. නමුත්, අද වන විට මේ තත්ත්වය යම් දුරකට වෙනස්ව තිබේ. අන්තවාදී රෙජීම පාක්ෂිකයින් හැර සෙසු සියලු දෙනාම දන්නා පරිදි පාන් රාත්තලේ සිටම විවිධ දේවල්හි මිළ සීරුවෙන් වැඩි වෙමින් තිබේ. අයවැය ඉදිරිපත් කිරීමටත් පෙරම මෙවැනි සියුම් මිළ ඉහළ දැමීම් කිහිපයක් සිදුවීම හා ඒ ක්‍රියාන්විතය අරක්කු හා සිගරට් වලින් ආරම්භ වීම සම්බන්ධයෙන් කියාවා ගත යුතු යැයි කල්පනා කළෙමි.

ආණ්ඩුවක් විසින් භාණ්ඩ හා සේවාවන්හි මිළ වැඩි කිරීමේදී සාමාන්‍ය භාවිත කරන උපක්‍රමය වන්නේ මෙවැනි දේය. එක්කෝ, සමාජයේ බොහෝ දෙනාගේ හිත දිනා ගත හැකි භාණ්ඩයක හෝ සේවාවක මිල ඉහළ දමයි. මේ සදහා ප්‍රකටම දුව්‍ය වන්නේ මත්පැන් හා මත්ද්‍රව්‍යයයි. දෙවනුව, එම මිළ වැඩි කිරීම් සාධාරණීකරණය කිරීමට හා ප්‍රශංසා කිරීමට තරම් සාධාරණ කාලයක් පොදු සමාජයට ලබා දෙයි. ඒම කාලය ගත වීමේදී, අරක්කු හා සිගරට් වල මිළ වැඩි කිරීම ඉතාම සාධාරණ හා යුක්ති සහගත වන බවත්, රුපියල් දෙකකින් හෝ තුනකින් නොව ඊට වඩා වැඩි ගණනකින් වුව ද මිළ වැඩි කිරීමේ කිසිදු අසාධාරණයක් නැතැයි  පොදු සමාජය විසින් මෙම මිළ ඉහළ දැමීම පට්ට ගැසීමට පටන් ගණියි.

‘පංච තන්ත්‍රය‘ පොත රචනා කළ විෂ්ණු ශර්මන් විසින් එහි කදිම වැකියක් ලියා ඇත. ‘අසල්වැසියාගේ පැළ ගිණිගන්නා විට, ඔබේ පැළට ද අවධාමක් ඇති යැයි සිතන්න‘ යැයි ඔහු ලියා ඇත. අසල්වැසියා මිතුරකු හෝ සතුරෙකු වේවා, ඔහුගේ නිවෙස ගිණිගණිමින් තිබෙන මොහොතක ‘අසාධාරණ සල්ලි වලින් හදාපු ගෙහල්‘, ‘ඔහොම වෙලා මදි‘, ‘හොද වැඩේ‘ ආදී වශයෙන් කියමින් අසල්වැසියාගේ නිවෙස ගිණි ගැනීම සම්බන්ධයෙන් සිය ප්‍රසාදය හෝ කැමැත්ත දක්වමින් සිටින විටදී, තමාගේ නිවෙසට ද එම ගිණි දැල් පැමිණෙන තුරු දැනෙන්නෙ ම නැත. අද වන විට සෙසු භාණ්ඩ හා සේවාවන්ගේ මිළ ඉහළ යෑම සම්බන්ධයෙන් ද මෙරට පුරවැසියන්ට අත්ව ඇත්තේ එවැනි ඉරණමකි. සිගරට් හා අරක්කු වෙනුවෙන් හුරේ දමමින් සිටින විටකදී, පාන් පිටි කිලෝවක මිළ ඉහළ යන තුරුම නොදැනුනේය. පාන් පිටි මිළ ඉහළ යාම පිළිබද අදහා ගැනීමත් පෙරම, පොදු සමාජයේ ලාභදායීම ආහාරයක් වන පාන් ගෙඩියේ ද මිළ ඉහළ ගියේය. 

නමුත්, මෙවැනි තත්ත්වයක් තුළ වුව ද රෙජීමයකට ජනතාවගේ ඇස් වසාන සිටීමට හැකි උපක්‍රමයන් ඇත. එකක් ආගම හෝ ජාතිය පිළිබද හැගීම උද්දීපනය කිරීමයි. අද වන විට නොනිළ වශයෙන් එය සිදු වෙමින් තිබේ. සියලු ගැටළු හා අර්බුද වසා දැමීම සදහා ජාත්‍යාලය හා ආගම් ආලය ජනගත කිරීම ප්‍රමාණවත් වේ. එසේත්, නැතිනම් විජාතික බලවේගයක් හෝ පරණ පම්පෝරියක් යළි මිනී වළකින් ගොඩ දමා ගෙන විකුණාගෙන ජීවත් විය හැකිය. අත්‍යාවශ්‍ය භාණ්ඩ හෝ සේවාවන්ගේ මිළ නිරන්තරයෙන් ඉහළ ගිය ද මෙවැනි අවිචාරශීලී පොදු සමාජයක් එකම මාතෘකා කිහිපයකින් පමණක් වුව ද අන්දවාගෙන සිටීමේ හැකියාවක් 1948 ට පෙර සිටම ද ඉන් පසුව බහුලව ද 77 න් පසු අති බහුලව ද 2008 න් පසු සම්පූර්ණයෙන්ම ද වශයෙන් දක්ට ඇත.

අරක්කු හා සිගරට් මිළ වැඩි කරන විට අමද්‍යපයන්, හාමුදුරුවරුන් හා කාන්තාවන් ඊට දැඩිව පක්ෂපාතීත්වය දක්වයි. ඩීසල් හෝ පෙට්‍රල් මිළ වැඩි කරන විට ‘අපිට වාහන නෑනෙ. ඕන දෙයක් කරපුවාවෙ‘ ය යන හැගීමෙන් ජීවත් වන සමාජ කුහකයින්ගේ පක්ෂපතාතීත්වය හිමි වෙයි. වාහන සදහා බදු වැඩි කරන විට ද එසේමය. ඊර්ෂ්‍යාව හා කුහකත්වය තුළින් ඊට අදාල පක්ෂපාතීත්වය නිර්මාණය වෙයි. වී කිලෝවක ගැණුම් මිළ ශත 50 කින් ද හාල් කිලෝවක විකුණුම් මිළ රුපියල් 5 කින් පමණ වැඩි කර ගොවියන්ගේ ද හිත දිනා ගනියි. දේශප්‍රේමී කතා කියමින් දේශප්‍රේමීන්ගේ ද පන්සල් හා පල්ලි වෙනුවෙන් කොඩි පූජා කරමින් හා විවෘත කිරීම් වෙනුවෙන් පණිවිඩ යවමින් ඔවුන්ගේ ද සිරකරුවන්ට අහේතුක සමාවන් ලබා දෙමින් ඔවුන්ගේ ද විපක්ෂයට කෑම බීම දී ඔවුන්ගේ ද හිත දිනා ගනමින් සිටියි. එවැනි වට පිටාවක් නිර්මාණය කර අවසානයේදී, හාල් කිලෝව ද ළූණු ලුණු පොල් අල ආදී සියලු අත්‍යාවශ්‍ය ද්‍රව්‍යන්ගේම ද මිළ ඉහළ දමයි.

ඇතැමුන් රෙජීමය කෙරෙහි අප්‍රසාදය හෝ රෙජීමයේ වැරදි සහගත සේ සම්බන්ධයෙන් නොකමැත්ත නොදක්වන්නේ විවිධ වරදාන හා වරප්‍රසාදයන් නිසාය. ‘අපේ නංගිට රස්සාව දුන්නෙ ප්‍රේමදාස මහත්යනෙ‘ යැයි කියමින්, යටකී රෙජීමයේ සෑම හොද හෝ එසේ නොවන ක්‍රියාවක් සම්බන්ධයෙන්ම දිවි හිමියෙන් සිය පක්ෂපාතීත්වය දක්වයි. පෙර දිනෙක ලංකාවේ ප්‍රකට හා පළමු පෙළේ ව්‍යාපාරිකයෙකු මේ දිනවල ව්‍යාපාර සදහා කිසිදු සුදුසු වාතාවරණයක් හෝ ආර්ථික තත්ත්වයක් රට තුළ නිර්මාණ වී නොමැති බව ද විශ්වාසයක් නොමැති බව ද කියා සිටියේය. නමුත්, ඔහු අවසානයේදී කියා සිටියේ, ‘මොනව වුණත්, නිදහසේ නාගදීපෙත් වැදගත්තැකිනෙ‘ යැයි කියාය. තම තමන් කැමති විෂයන් මගින් රෙජීමය තමන් අමන්දානන්දයට පත් කර ඇති නිසා, එක්කෝ සෙසු දේවල් නොපෙණේ. නැතිනම්, නොදැක්කා ලෙස සිටීමට සිදු වේ.

Saturday, October 27, 2012

කුම්බලා මාළුව

 පසුගිය දින කිහිපයක්, සේවය කළ ආයතනයට පින්සිදු වන්නට විවේකයෙන් ගත කිරීමට අවස්තාව හිමි විය. මේ විවේක කාලයෙන් වැඩි කාලයක් ගත කරනු ලැබූයේ රස්තියාදු ගැසීමට හා වල්පල් දොඩවමින් ගත කිරීමට වෙන් විය. පුස්තකාල, තේ කඩවල්, යාලු මිත්‍රාදී සහචරයන් හමුවීම, ආදරය කිරීම හා තැන් තැන් වලට වී කාලය ගත කරමින් සිටින අතර වාරයේ හමුවෙන උන් සමග කඩ දමා ගැනීම මේ කාලයේදී නොවඩුව සිදු විය. ලියුම්කරුවා, මෙම ලිපිය ලිවීම දක්වා ඒ අතරින් සිද්ධීන් දෙකක් පොළඹවනු ලැබීය.

පසුගිය සතියේ දවසක් බම්බලපිටියේ සිට දෙහිවල දෙසට යමින් සිට, වැල්ලවත්ත මැරීන් ඩ්‍රයිව් පාරේ බයිසිකලය නවතා මුහුදු සුළග විදිමින් විනාඩි කිහිපයක් විවේකයෙන් ගත කළේය. මේ මොහොතේ එතැන නැවතූ ත්‍රී රෝද රථ රියදුරෙකු ගින්දර විමසමින් මා වෙත පැමිණියේය. ඔහුට ම වෙතින් ගින්දර නොලැබුණ ද ඔහු හිතෛශී සිනහවක් පෑ නිසා ඔහු සමග කතාවට වැටිණි. විනාඩි කිහිපයක් පමණක් කතා කරමින් සිටින අවස්ථාවේදී ඔහු ඉතිහාසයේ කරනු ලැබූ කටයුත්තක් සම්බන්යෙන් දැඩිව කම්පා වන බව ද පසුතැවිළි වන බව ද කියා සිටියේය. ‘කවුද හිතුවෙ මල්ලි මෙහෙම වෙයි කියල. යුද්දෙ නම් ඉවර උණා තමයි, හැබැයි හතර දෙනාට නොමැරී ඉන්න මාසෙකට තිස් දාහක්වත් ඕනෙ. ඒත් කාල නෙවෙයි ලෙව කාල‘ යැයි ඔහු කියා සිටියේය.

යටකී දෙවැනි සිද්ධිය සිදු වන්නේ අද දහවල්ය. මින් පෙර සමාජවාදී පක්ෂයක පෝස්ටර් ඇලවීමේ සිට කැන්වසින් යාම හා සභාවට ඡන්දය ඉල්ලීම දක්වා දැඩි කැපවීමෙන් හා වෙහෙසින් වැඩ කරමින් සිටි ජවිපෙ කාඩරයකු නිවෙස කරා යමින් සිටිනා අතර වාරයේ, මා ගමන් ගත් බයිසිකලයට අත දමා ඔහු නග්ගවා ගැනීමෙන් පසු කතාවට වැටිණි. ඔහු ආ-ගිය තොරතුරු හා විස්තර අසා විශ්වවිද්‍යාලයේ විස්තර අසා සිටියේය. ‘බලන්න නේද පුතා, මාස තුනක් අහකටම ගියා. කිසි එකෙක් ගාණකටවත් ගත්තෙ නෑනෙ. උන්ගෙ උන්නම් රටවල්වල යවල උගන්නයි. සල්ලි තියන පංතිය ප්‍රයිවට් හරි කර ගනියි. ඒත්, මේ රටේ දුප්පත් මිනිස්සුන්ගෙ දරුවො අනාථයිනෙ. දැන් බලන්නකො තුන්වේල කාල ඇදල ඉන්න කීයක් හම්බ කරත් බෑණෙ. රටේ නීතියක් කියල ජාමයක් නෑ.‘ යැයි ඔහු තවදුරටත් දිගින් දිගටම කියමින් සිටියේය.

මෙම සිද්ධීන් දෙකට අදාල පුද්ගලයින් දෙදෙනා නියැදියක් කර ගනිමින්, පොදු සමාජයේ බහුතරය අකමැති අවලෝකනයක් සිදු කිරීමට කල්පනා කළෙමි. මෙය බොහෝ දෙනෙකුට අමිහිරි යැයි කියා සිටින්නේ, තමන් විසින් වැරදිසහගත දෙයක් කරනු ලැබ ඇති බවට හෝ වැරදි තීරණයක් ගෙන ඇති බවට පිළිගැනීමට පුද්ගලයින් තුළ ඇති නොකමැත්ත නිසාය. එසේම, අද වන විට ජයග්‍රහණයේ සුජාත භාවය තමා සන්තක කර ගැනීමට වෙර දරන පිරිස හා පරාජයන්ගේ අවජාතකභාවය මනාව දැක බලා ගත හැකිය. යුද්ධය පහර දී අවසන් කිරීම යන ආඛ්‍යානයේදී රටේ සෑම පුද්ගලයකුම එහි ගෞරවය හෝ කීර්තිය තමා සතු කර ගැනීමට හෝ තම පිළ සතු කර ගැනීමට යත්න දරයි. නමුත්, අධිකරණයේ ස්වාධීන්ත්වය නොමැති වීම, පොලිස් රාජ්‍යයක් බිහි වීමට අවශ්‍ය වටපිටාව සැකසීම, වෛද්‍යවරයෙකු වී නිදාගන්නා දරුවන් පශු වෛද්‍යවරුන් වී අවදිවන විට මෙන්ම පෙරවරු 9.00 ට ආරම්භ වන ශිෂ්‍යත්ව විභාගයේ ප්‍රශ්න පත්‍ර අළුයම 5.00 සාකච්ඡා කරන විට නෑසුනා සේ බලා සිටියි. එසේම, ඒවාහි වරද තවකෙක් වෙත හෝ අනෙකා වෙත පටවා අත පිස දමා ගැනීමට යත්න දරයි.

අද වන විට ජනතා විමුක්ති පෙරමුණ ද පෙරටුගාමීන් ද රාජපක්ෂ රෙජීමයට එරෙහිව පෙළපාලි යයි. ප්‍රජාතාන්ත්‍රවාදය - යහපාලනය - අධිකරණයේ ස්වාධීනත්වය පිළිබද මොර දෙයි. ඒ සෑම විටෙකම රෙජීමයේ පුටු අත්හැර යන්නැයි රෙජීමයට තර්ජනය කර සිටියි. නමුත්, මෙම රෙජීමය මෙතරම් හිතුවක්කාරී හා ආධිප්‍යයකින් යුතු රෙජීමයක් බවට පත් කිරීමේ ‘කැන්වසින් යාම‘ හෝ කඩේ යාම සිදු කරනු ලැබූයේ ද තමන් විසින්ම බැව් ඔවුන් කියා නොසිටියි. මහින්ද රාජපක්ෂ වෙනුවෙන් චන්ද්‍රිකා වැඩි සහායක් ලබා නොදෙනා විට ජනාධිපති චන්ද්‍රිකාගේ පරම බලය පවා හමුවේ ජවිපේ ඊට එරෙහි අපේක්ෂකයා වෙනුවෙන් කඩේ ගියේය. පසුව, ඔහු ඔසවාන පැමිණ අසුන් තුළ වාඩි කරනු ලැබුයේය. දැන් දැන් රෙජීමය පට්ට ගසමින් සිටින වේගයෙන්ම හා ධෛර්යයෙන්ම රෙජීමය සිංහාරූඪ කිරීම වෙනුවෙන් කටයුතු කළේය. 

අද වන විට රෙජීමයට එරෙහිව සරසවි සිසුන් පෙළගස්වන සංජීව බණ්ඩාරලා එවකට චරිත නොවූව ද අද වන විටත් සංජීවලා පෙළගස්වමින් සිටින දුමින්ද නාගමුව, චමීර කොස්වත්ත හා පුබුදු ජයගොඩ වැන්නන් ද නලින්ද ජයතිස්ස වැන්නවුන් ද එදා සරසවි සිසුන් ලවා නගර ගම් පුරා පෝස්ටර් ඇලවෙව්වේ ද මේ රෙජීමය වෙනුවෙන්මය. දරු මුණුපුරන් වෙනුවෙන් කිරි පැකට් එකක් මිලදී ගෙනැවිත් දීමට අසමත්ව පරාජිත හා මූසල මනසින් යුක්තව හූල්ලමින් සිටින මැදිවිය පිරිමින් හා ගැහැණුන්, තරුණ තරුණියන් ලෙස එදා රෙජීමය වෙනුවෙන් කැන්වසින් ගියේය. කන්න තියන බත් පත කැප කරමින් සරම-බැණියම අදින සංවේදී රෙජීමයක් වෙනුවෙන් කැට හෙල්ලුවේය. තවත් බොහෝ දේ අඩු වැඩි වශයෙන් කරනු ලැබීය. නමුත්, එදා එසේ කර සිටි ඔවුන් අද වන විට රෙජීමයේ පරම සතුරන් වී සිටියි. ඔවුන්ට ද රෙජීමය තරම් සතුරෙකු වෙනත් නැති වී තිබේ. 

සරලවම කියන්නේ නම්, අද වන විට රෙජීමය යම් වැරදි දිශානතියක ගමන් කරන්නේ නම් හෝ වැරදි සහගත දේ කරමින් සිටින්නේ නම්, එහි වරද අදාල දේ අද වන විට කරමින් සිටි රෙජීමය ඉදිරියෙන් සේම මේ අයුරින් හිතුවක්කාර කරනු ලදුව රෙජීමය නිර්මාණය කිරීමේ දැඩි උත්සාහයක නිරත වූ හා එය සාර්ථක කරගත් වම්මු හා දේශප්‍රේමීන්ගේ නම ඉදිරියෙන් ද ලියැවේ. අධ්‍යාපනය වෙනුවෙන් මුදල් ප්‍රතිපාදන ලබා නොදීමේ වරද රෙජීමයේ වන අතර, අධ්‍යාපනය පිළිබද වැඩි හැගීමක් නැති රෙජීමයක් පත් කිරීම, රෙජීමය පත් කළ හා ඒ වෙනුවෙන් කඩේ ගිය අයගේ වරදකි. සෞඛ්‍යය, නීතිය හා යහපාලනය, ආර්ථිකය, ණය. මූලික හෝ මානව අයිතිවාසිකම් ආදිය පිළිබදව ද එසේමය. දඩාවතේ යන බල්ලකු නාවා පිස දමා කෑම බීම දී ගේ තුළ දමා ගත් පසු ඌ, නිවැසියන් සියලු දෙනා සපා කමින් සිටින විට, එහි වරද තනිව බල්ලා මත පටවා ඔහුට ගසා-මරා දැමීම පමණක් අසාධාරණ වේ. බල්ලා විසින් කරනු ලබන වරදවලට, ඌ ගෙතුළට වද්දා ගත් මිනිසා ද වන්දි ගෙවිය යුතු වේ.

 මෙය රෙජීමයේ වරදක් නොව. මධ්‍යම කාරක සභාවේ හෝ දේශපාලන මණ්ඩලයේ තෙල් වලට රැවටී සුභ අනාගතයක් වෙනුවෙන්, සෑම දිනකම පාහේ වැරදි තේරීම් සමග හිට ගන්නා වම්මුන්ගේ හා දේශප්‍රේමීන්ගේ වරදකි. රෙජීමයට නොව, වෛර කළ යුත්තේ වැරදි දේ ජනගත කරමින් වැරදි දේ වෙනුවෙන් ජනතාව පෙළගස්වනු ලැබූ පිළටය. 2004 දී පටන් ගත් වැරදීම අඛණ්ඪවම 2005 දී ද එසේ විය. 2010 දී අනූ නවයෙන් මගහැරිණි. මෙයින් අදහස් කරන්නේ මහින්ද රාජපක්ෂ යළි පත් වීම අනුමත කරන බව හෝ නැති බව නොවේ. සරත් ෆොන්සේකා පත් වීම අනුමත නොකරන බව පමණි. (සාමයට පක්ෂ වූ පමණින්, යුධ විරෝධී පෙළපාලි යා යුතු නොවේ යන තෙරේසා මව් තුමියගේ කියමන හා ගපා ගන්න.) කුම්බලා මාළු කෑ පූසන් යළි යළිත් හමු වීම වලකාලිය නොහැක. ඔවුන් වෙනුවෙන් කීමට ඇත්තේ, ඔබේ හිතුවක්කාර තේරීම නිසා අද විදවන්නේ ඔබ පමණක් නොවේ. ඒ තේරීම වැරදි බව පුණ පුණා කියා සිටි පිරිස් ද ඉන් විදවමින් සිටියි. 

Friday, October 26, 2012

ඔබාමා වෙනුවෙන් පෙනී සිටිමි.

පූර්ව සටහනක්

“මිනිස්සුන්ට කළාව, සාහිත්‍ය, රසවින්දය, විචාරය වගේ දේවල් වෙනුවෙන් කැප කිරීමට ප්‍රමාණවත් කාලයක් අවශ්‍යයි. හැමෝම යටකී විෂයන් කෙරෙහි උනන්දුවක් හෝ වෙහෙසක් නොදක්වන්නේ කුමක් නිසා දැයි අසා සිටින විට, ඒ වෙනුවෙන් ලබා දෙන සරලම හා පහසුම පිළිතුර ද ‘වෙලාවක් නෑ‘ කියන එක. ඒක එහෙම වෙන්න පුළුවන්. නමුත්, ඒ වගේම එවැනි විෂයයක් කෙරෙහි හෝ අඩුම තරමින් ආදරය කිරීම, පෙම්වතුන් හා පෙම්වතියන් සිප වැළද ගැනීම, රමණය කිරීම, දබර කිරීම ආදියට ද කළාව - සාහිත්‍යය - රසවින්දනය - සිනමාව - කියවීම - හැදෑරීම වගේ දෙවල් වලටත් ඒ සදහා අවශ්‍ය නිදහසක් (දේශපාලනික හා සමාජයීය) හා සුරක්ෂිත හැගීමක් අවශ්‍යයි. මෙම බ්ලොග් අඩවිය, ඇතැම් පිරිස් විසින් බහුල ලෙස පරිහරණය කරමින් සිටින මොහොතක දී වුව ද හදිසියේම පසුගිය වසරේ අවසන් භාගයේ අත්හැර දැමීමට සිදු විය.

ඇත්ත වශයෙන්ම එය අත්හැර දැමීමක් නෙවෙයි. වී. අයි. ලෙනින්, ඔහුගෙ ‘නව ආර්ථික සැලසුම්‘ කියන ප්‍රතිපත්තිවල කියනව, ‘ඉදිරියට යා නොහැකි තරමේ අභියෝගයක් ඇති විට තාවකාලික පසු බැසීමකින් පසු සුරක්ෂිත වී යළි පෙරට පැමිණෙන්න‘ කියල. යම් අවස්තාවකදි දේශපාලනික හො සමාජමය වශයෙන් සුරක්ෂිතතාවය හෝ නිදහස නොලැබෙන විටදි, එහෙමත් නැත්තම් ඇත්තටම ඒ වෙනුවෙන් වෙලාවක් නැති අවස්ථාවක සන්නද්ධ නොවූ අවියකින් හිස ලූ ලූ අත වෙඩි වරුසා ඇද හැලීම වෙනුවට, අවි ශක්තිමත් කර යළි පහර දිය යුතු වේ. නමුත්, පසුබසින මොහොතෙදි අපිට තීරණය කරන්න බෑ, යළි පෙරට යා හැකි තරමේ විශ්වසනීය සුරක්ෂිතතාවයක් ඇති වෙන්නෙ මේ වෙලාවෙදියි කියන එක. ඒ වගේම, යම් ප්‍රමාණයක ස්ථායිතාවයක් ගොඩ නැගුණු විගස එය වඩාත්ම ස්ථායි මොහොත බව පවා තීරණය කළ නොහැකියි. කෙසේ නමුත්, කෙටි හෝ දිගු විරාමයකින් පසු යළි කියවා ගත් දේ ලියා දැමිය යුතු යැයි දැඩිව සිතෙන්නට විය. ඒ වෙනුවෙන් ප්‍රමාණවත් හා ආත්ම විශ්වාසයක් ගොඩනගා ගත හැකි වෙලාවක්, සුරක්ෂිතතාවයක් හා පරිසරයක් නිර්මාණය වී ඇතැයි දැනෙනවා. ඒක එහෙම වෙන්නෙ පුද්ගලයා ලෙස රවුම් කළ පසු ලියුම්කරුවා පිළිබද නොවේ. කියවීමක් ලෙස ගත්තහම තියන හැදෑරීම පිළිබදව.“


ඇමරිකානු ජනාධිපතිවරණය එළඹෙන දින කිහිපයේදී පැවැත්වීමට නියමිතව තිබේ. ඇමරිකානු ජනාධිපතිවරණය යනු ඇමරිකානුවාට හෝ එම ලීගයට පමණක් බලපවත්නා හෝ බලපානා තීරණයක් නොවන බැව් අප විසින් පිළිගත යුතුය. ඇමරිකාවේ ජනාධිපතිවරයා කවුරුන්ද යන බව දකුණු ආසියාවේ මුහුදු සුළගින් පාවී එන ආශ්චර්යමත් සිහින විදිනා පුරවැසියාට ද රුසියාව හෝ චීනය වැනි ඇමරිකානුවාගේ තරගකරුවන්ට ද තම රටේ සිතියම් පොතක හැර වෙනත් කිසිදු රටක අඹමල් රේණුවක අවධානයක් දිනා නොගන්නා පැසිෆික් සාගරයේ පුංචි දූපතකට ද අඩු වශයෙන් ද වැඩි වශයෙන් ද බලපායි.

ඇමරිකානුවන් අවබෝධයෙන් හා දූර්දර්ශී භාවයෙන් යුක්තව නායකයා තෝරාගත් අවස්තාවන් කිහිපයකි. මෙය ද පෙර අවස්ථා කිහිපයක් හා සැසදීමේදී තීරණාත්මක බවින් අඩු හෝ අල්ප වටිනාකමක් ගත්ත ද බොහෝ ඇමරිකානු ජනාධිපතිවරණයන්ට සාපේක්ෂව වැදගත් තැනක් ගනියි. එහෙයින්, ඇමරිකානු ඡන්ද පදනම තුළ කිසිදු වටිනාකමක් හෝ තත්ත්වයක් නොමැති තුළ සිට පවා මෙවර ජනාධිපතිවරණයේදී ඔබාමා වෙනුවෙන් පෙනී සිටීමට හෝ ඔහු වෙනුවෙන් ආශීර්වාද කිරීමට ද යාඥා කිරීමට ද කල්පනා කළෙමි.

හේතු පැහැදීම...

ඇමරිකානු 9/11 ප්‍රහාරය යනු හුදෙක් ඇමරිකාවට හෝ එහි ලීගයට පමණක් මුහුණ දීමට සිදු වූවක් නොවේ. භෞතිකමය හානිය සීමිත වුව ද එමගින් ඇති වූ බලපෑම අතිමහත්. 9/11 ප්‍රහාරය විසින් ඇමරිකානු බලවන්ත භාවය ප්‍රශ්න කරනු ලැබීය. ඇමරිකානුවා විසින් එතෙක් සිතා සිටි තරම්, තමා බලවත් නොවන බව ද බලවන්ත වීමේ සිහිනය යථාර්ථයක් කර ගැනීම සදහා තවදුරටත් කැප විය යුතු බවටත් එහිදී උගන්වා සිටියේය. ඇමරිකානු පුරවැසියා ද ඇමරිකානු පාලනය ද ලෝව බලවත් බවේ සංඛේතය ඇමරිකාව නොවන බැව් වටහා ගන්නෙ ද ඒ වෙනුවෙන් නව පිඹුරුපත් සකසන්නේ ද 9/11 පාඩමක් කරගෙන බව නොරහසකි. 9/11 හි සතුරන් වූ ඔසාමා බින් ලේඩාන් හෝ අල් කයීඩාව ද එසේ නොමැති නම් ලක්ෂ-ඊ-තයිබා හෝ වෙනත් එකක් ද ඒවාහි ඒකරාශී වීමක් ද 

ඇමරිකානුවාට එරෙහි වීම හෙවත් විස නැසීම වෙනුවෙන් විසට එරෙහි ප්‍රතිජීවකයකු ලෙස බුෂ් හෝ වෙනකෙකු නුසුදුසු බවත්, විස නැසීම වෙනුවෙන් විස කුලයේ ලෙයින්ම උපන් ඔබාමා සුදුසු වන බැව් ඇමරිකානු පුරවැසියා තෝරා ගන්නේ එහෙයිනි. අභිමානය අහිමි වූ ඇමරිකානුවන් අභිමානය ප්‍රතිශ්ඨාපනය කර ගැනීම දක්වා නගා සිටුවීමට 9/11 සමත් විය. ඇමරිකානු ජනාධිපති බුෂ්, සිය ප්‍රතිවාදියාට එරෙහිව තෝරනු ලැබූයේ තමා උපන් පොළොවේ උපක්‍රම හෝ විධික්‍රමයන්ය. ඔහු සූක්ෂම හා තීක්ෂණ යැයි කල්පනා කළේ කැලිෆෝනියාවේදී හෝ වොෂින්ටනයේදී සතුරකු මර්ධනය කිරීම පිළිබද ඔහු උගත් දේ ය. නමුත්, ඔබාමා යනු ඔහුට සාපේක්ෂ අපේක්ෂිත සැලසුමකින් හා අනෙකාට සාපේක්ෂ අනපේක්ෂිත ගමනකින් පසු වොෂින්ටනයට පැමිණි අයෙකි. ‘වෙනස වොෂින්ටනයෙන් නූපදියි. වෙනස වොෂින්ටනය සොයා එයි‘ යනුවෙන් ඔහු  විසින්ම ලියා සිටින්නේ එහෙයිනි. එහෙයින්, බලවන්තභාවය පිළිබද බිදුණු මනසකින් යුතු වූ ඇමරිකානුවාට ඔබාමා විසින් කෙන්යාවේ සිට ඉලිනෝයි හරහා සෙනට් සභාව වෙත පැමිණීම දක්වා ගමනේ උගත් දේ භාවිත කරමින් යළි අභිමානය ලබා දීමට සමත් විය. ඔසාමා ඝාතනය කළේය. කියුබාවෙන් හා වෙනිසියුලාවෙන් ඇමරිකානුවාට ප්‍රශංසා ලබා දුන්නේය. ඉන්දියාව හා පැසිෆික් ඕස්ට්‍රේලියාව ඇමරිකානුවාගේ අත යටට ගෙනැවිත් දුන්නේය. ඇමරිකන්කාරයා පොරක් කරනු ලැබීය.

එසේම, පාලකයාගේ සදාතනික සංඛේතය වූ ටයි කෝට් දමා ගත් ආණ්ඩුවක් වෙනුවට සරමක් හා බැණියමක් ඇදගත්  එකෙකු වෙල් යාය දිගේ පැමිණ දරුවකු හුරතල් කිරීම තුළින් වැව් ගම්මාන වලට ‘අපේ ආණ්ඩුව‘ යන ගැහීම පෙව්වා සේ ගරු ගාම්භීර සේයාවක් හා මිස්ටර් ප්‍රසිඩන්ට් වෙනුවට, පශ්චාත් සමාජශීලී වැසියන් වෙනුවෙන් ‘මචං‘ කෙනෙකු වීමට ඔබාමා සමත් විය.

එසේම, අද වන විට පෙර කල්හි ප්‍රබලයින්ව සිටි රුසියාව ‘ඇන්ටික්ස්‘ බවට පත්ව තිබේ. නිවසේ සිටිමින් පරණ පම්පෝරි ගසමින් බුලත් විට හපමින් සිටින සීයාගේ හෝ ගරාජයේ උජාරුවට ගාල් වී සිටින දඩු ෆෝර්ඩ් හෝ මයිනර් තත්ත්වයට පත්ව තිබේ. චීනය යනු, පමණ ඉක්මවූ අධි තක්සේරුවකට පත්ව සිටින තරුණයෙකි. ඉන්දියාව යනු යටකී කොල්ලා සමග ඇති අමනාපය හේතුවෙන් වැල යන අතට මැස්ස ගසමින් සිටින බාප්පා කෙනෙකු වැනිය. එසේමනම්, අද වන විට බලවන්ත බවේ සම තත්ත්වය හිමිකරගෙන සිටිනුයේ අරාබි ලීගය හෝ මුසල්මානු පුරවැසියන් යන පොදු රාජ්‍යයයි. ජාත්‍යන්තර සබදතා මූලධර්මයන්ට අනුව, ලොව සමතුලිතතාවය ආරක්ෂා වීම කෙරෙහි ප්‍රබලයින් දෙදෙනෙකු අවශ්‍යව ඇත. යම් හෙයකින් අද වන විට ඔබාමා විසින් ඇමරිකානුවා ප්‍රතිශක්තිමත් නොකර සිටිනු ලැබූයේ නම්, කුරානයේ ඇති ශුද්ධ යුද්ධයේ ඇසින් දුටු සාක්ෂි කරුවන් වීමට අපට සිදුවනු ඇත. කුරානය විසින් පිහිටවනු ලැබූ කුරානවැසියන් නමැති දඩ බල්ලන් හීලෑ වී සිටින්නේ ඇමරිකානු බයිනේත්තුවේ අළුතින් කොටනු ලැබූ වෙඩි බෙහෙත් නිසාය. (ආගම්වාදයක් පිළිබදව නොවේ, දේශපාලන කියවීමක්. මෙතන අද මුස්ලිමුන් වෙලා, හෙට වෙනත් කෙනෙක් වෙන්න පුළුවන්.)

මතු සබැදේ...